【護士分享】寧待快餐店

如何與患癌父親溝通

Whatsapp 收到一位認識多年並已移民的朋友訊息：「 安安，想問一下，香港有邊間機構有 hospice unit 和怎樣申請？我爸爸有cancer。」

「睇 HA醫院定私家？」

「HA」

「現時有不適嗎？在家？在醫院？」

「下星期會去QE oncology」

「直接同主診醫生講想接受 Hospice care」

「三月份在廣華切了部份肝臟，現在醫生發現骨和肺都有腫瘤，佢行路會痛。我星期五會到香港 2星期，希望到時候大家可以見面。」

「可以呀！覆診腫瘤科時向醫生反影有痛，看用什麼方法止痛。 現在痛的程度需要考慮去急症室或者去一般家庭醫生又或者私家醫院求診食住藥先嗎 ？」

「我打算同佢一齊見醫生，否則佢見醫生只會話無事。」

「明呀！ 這樣的情況的確會令你很擔心。他上次覆診時有給止痛藥嗎？」

「無，佢同醫生講無事。佢一直同醫生話無事，無符。又唔想住院，話無得落街去麥當勞。」

「oncology 覆診時提出轉介 Hospice care，行得走得多數只安排專科門診、家訪服務，未必要住院的。」

「佢話痛要打針，但唔好意思同醫生講。」

「留住在家，有家訪 support 有需要才入 Hospice bed。」

「我都係咁想，因為若佢身體情況太差，我阿媽handle 唔到，但想先排隊準備。」

「約你覆診前一齊上去見見他？」

「我 ok 呀！你幾點方便我就捉住佢，我會在 XX 近地鐵。」

「我全日都 ok，不過唔好嚇親佢，跟住乜都唔同你講，包括痛唔痛。」

「點 approach 好？好似捉貓一樣。」

「他仍可以自己出街？都仲撐得下喎！」

「會，用行山杖，拐下拐下咁囉！」

「不用急於告訴世伯什麼什麼，教他什麼什麼⋯記住他食鹽多過我們食米，一步步聽和觀察他具體現況，他的想法：攞料！攞料！攞料！經歷了手術，現在又轉移不同地方仲咁面不改容，多啲讚他好挨得！好叻仔！多謝他到這一刻仍然不想其他人太擔心他！錫住亞媽同你哋，不過，也提他有嘢要出聲。讓他自然地講多啲他的想法，攞料！聽嘢！」

「 知道呀！我都有聽佢講㗎！佢呻話第日要入醫院，困住佢，唔可以去麥當勞，實悶死呀！咁我就話，如果係我，我一向都冇你咁捱得，實慘過你！」

「其實佢去麥當勞，點解可以幫佢解悶？」

「佢鍾意睇人行嚟行去啩，我都有問佢有啲乜嘢心願。佢就話講低曬啦，之後就乜嘢都唔講。」

「所以你形容為好似捉貓咁？⋯我聽到嘅係 timing 問題。你阿爸都唔係乜都唔講，當佢話冇得去麥當勞會悶死，而你嘅回應話畀著係你你會慘過佢。咁嘅情況之下，佢就講唔落去啦！又或者在那一刻 ，你自己其實都未準備好去聽阿爸啲苦水！畢竟呢個話題真係好沉重。」

她嘆了口氣。

「喺佢嘅世界，可能悶，冇得去麥當勞睇人行嚟行去，比起痛更加難受。不過佢這個觀點，你未必認同。而當你直接了當地問他有沒有任何心願時，他亦有可能覺得氣氛怪怪，唔想講呢啲而避開。不過你唔需要太介意今次未傾到，做就一啲輕鬆嘅氣氛就可以又再傾過。而你爸爸可能亦會揀某些話題跟你媽媽傾，未必想同你講。」

「 但是如果是我，我又真係很難可以像他一樣撐得過去。」

「 你可以話：我好難想像如果事情發生係自己身上，一定會好擔心，好徬徨， 好束手無策，唔知點面對， 不能像你一樣咁硬淨。 一世人兩父女，到了依家這個關頭，畀我們試下幫你分憂。」

「我諗我明多了一些。」