60出頭入住長者屋，係乜嘢玩法？（中）

起初有點抗拒，點解咁後生要住老人院？其中原因之一，之前舊居已經住咗24年，由新樓變成半新舊樓，如果繼續住落去，要來個大裝修，之後再搬返去，即係搬兩次屋。咁10年後又如何呢？先生比我大幾年，佢話人生無常，一旦有事，得我一個人就會好難搞。

佢情願趁自己有氣有力嘅時候，一次過辦妥所有繁複手續，之後就無後顧之憂。亦因為我哋冇子女，出咗事到時唔會有人幫我地奔走。但其實就算有子女，好多老人家都唔想麻煩啲後生。呢個諗法我同意，亦唯有接受。

從財務經濟角度，日本正逐漸從通縮走向通脹，意味着房地產會越嚟越貴，而舊屋升幅就追唔上新屋，所以趁現階段即賣即買（居住權費），鎖定價格之後就無需再理會升跌。呢類長者屋喺日本越嚟越普遍，優質設施環境、管理完善嘅，未入伙已被滿額認購。最近甚至有外國基金來日本視察，探討長者屋嘅投資潛力。

入住近一個月，so far so good感覺良好。大部份住客，目測都70歲以上，間中有幾個60+。我就不停俾啲「婆婆」捉住問長問短，質疑我唔夠秤（最低入住年齡是60歲)。一切還在適應中（待續）