【護士分享】唔好嫌自己蠢

重覆練習如何插鼻胃喉

文：安姑娘

梁太的丈夫突然中風，需要使用鼻胃喉管飼，她雖然一向精靈，但也顯得手足無措。

「已經看過醫院姑娘示範，亦看了短片很多次，但是要我自己一個去餵奶真是好驚！現在人又老、眼又矇、手又不聽洗，人蠢又無記性……我以前答應過老頭子唔會唔理佢，掉他去老人院，現在唔知點算！」

「這是一個大 project，你好有勇氣去承擔！現在同你補吓習，溫習好，遲一點應付醫院姑娘考試好不好？」

「你要救救我！」

「你最記得姑娘叮囑你什麼？」

「餵之前一定要先驗喉管抽出來的水夠唔夠酸，如果條喉走了位，奶落錯去肺會肺炎，咁就死得啦。」

「你記到最重要的一點，好叻呀！」

「死得人喎，聽一次就記住啦。」

「重點聽一次就記得，又點可以話自己蠢同無記性呢？」

「唔係呢，我真係記唔到點攪呢。」

「曾經聽過一位老師這樣說：每個人要學識一樣新東西，要記住，例如背一篇文、不用睇歌紙去唱一首歌、包餃子、包糭、打麻雀……關鍵在於重複讀過幾多次、做過幾多次。你可能需要重複50次？100次？1000次？才會記得、才會熟練。熟的意思是，放下了一段日子後隨時隨手都很快可以背到做到。當你重覆做夠這個數目，自然就會記到，未到這個數字前嫌棄自己蠢、冇記性是沒幫助的，倒不如老老實實重覆讀好、唱好、做多幾次？」

「咁又係。」