【50歲後才開始的事】快樂節約生活（4）香港退休靠年金？

文：Janet Lui

(編按：作者閱讀日本71歲單親媽媽紫苑的著作後，反思50+生活、衣食住行、中產身份障礙。連續四週文章，將從日本退休處境談到香港情況。)

《71歲，將所有下點功夫，以年金每月5萬円快樂地過節約生活》作者紫苑最大嘅覺悟，係醒覺到自己「原來從來不是中產」。呢個覺悟令佢由「情勒仔女要佢哋提供退休前生活水平」，變成「自立自理安貧樂道」，無論家庭關係抑或自我認同都大幅改善。經過投資雷曼失敗、面對現實期間，佢發現同世代很多經過 bubble 虛妄的人，都有「中產錯覺」，以前無嗱嗱幾步路都坐的士、明明洗大咗又覺得好普通：大佬呀你得二千幾蚊年金中乜嘢產呀？

而好多長者會因為年金少而覺得自己人生一敗塗地、自我形象低，覺得慳住慳住好醜；又有人因為仔女出身時正值通縮、就業冰河時期無法自立，一世變咗喫老族而羞於求助。作者希望同世代嘅人重新以自立自主為生活主軸，應慳則慳、唔好為面子充撐場面；主動開口求助，其實係心臟強大嘅表現。

少少意外係佢有提藤田孝典的《下流老人》令佢醒咗，藤田氏列出「中產立即下流」的 5 大 pattern為：
1）因病或意外突然負擔高額醫療費；
2）無法入住津貼院舍；
3）仔女唔生性成為啃老族；
4）熟年離婚；
5）患上腦退化而無人可依靠。

當中「熟年離婚」對父權社會的男性影響遠比女性大，因為男性 life skill 太差，在日本熟年離婚而生活失能的老年男性遠遠多於女性。作者睇完本書，得出四大免於斷崖式下流嘅預備係：
1）主動了解自己應得的社會保障，應得嘅支援就應該攞；
2）幾時都有危機意識，為病患及老後照顧做好準備；
3）放棄無謂的自尊；
4）學習接受幫助。

有這些 reality check 之後，作者即使覺得自己退休後需要過節約生活，但身心靈上都正面應接「下流」變化，而且有意識做運動、保持認知刺激，呢點係好值得欣賞。

我觀察係，作者不知不覺已經做緊防止腦退化嘅動作，專用字係「Instrumental Activities of Daily Living (IADL)」，透過日常 routine、煮飯洗衫、坐車買餸，活用咗金錢管理、時間空間邏輯等等動腦嘅判斷力、理解力。自立的三大主軸，進食（包括食藥）、排泄、沖涼換衫就是日本（其實香港都差唔多）判斷長者需要幾多社區支援嘅指標。如果長者有能力，每日由自己處理生活小事，其實係最好嘅認知訓練。

自己响日本做窮學生時生活過，最窮時試過¥100三盒納豆，一餐一盒配即沖海帶麵豉湯、加一碗白飯，營養面係啱啱好照顧到，但難言過得愉快。睇咗佢嘅菜單，感覺佢有我做工讀生所無嘅「時間」，所以一日可以煮三餐。或者呢個就係「退休 ＝ 用時間過得有 life 啲」嘅思考，令有限嘅資源都可以衍生樂活嘅生命力。睇完呢本書，某程度都令我真心覺得年金制度，無論幾少，都係好重要。

咁啱早兩日 NOW 經緯線做咗集《退休 • 退憂》，都係講「退休生活水平連續三年下降」，主要係療養用品（成人尿片、輪椅）呢三年加價三成。我好奇上去政府香港年金個網站撳下條數，發現，DKLM，同係75歲，男人一筆過入一百萬，每月派$7,360，但女人只係派$6,420，少咗足足$940，咁啲 fund 佬就梗係話女人平均長命啲所以派到死會拎多啲啦（佢自己個計算機係預計女人只係長命過男人4年），不過睇返衛生署啲病理統計數，女人本身患危疾嘅機會係多過男人好多囉（淨係數 column 都多一倍）！

咁啲男人任性三高、食煙飲酒攪到自己短命又竟然可以年金分多啲，女人公一份婆一份、又要做埋照顧者捱到退休又畀你班精算師嫌命長派少啲？真心，話個社經結構無刻薄女人就真係…… 哈哈哈哈。

寫緊呢堆digest時，望下作者個IG，本書已經9刷賣咗9萬本，計7％一本版稅（¥98），即係2022年到而家紫苑女士多咗一筆 ¥882 萬嘅版稅收入，總算有個尾運吖。Btw，如果有華文出版社想出譯本，我都願意加個本港情境增訂版，當係做吓功德。香港其實都好缺呢類長者日常自理書。