【照顧者分享】自己幫自己

照顧者的領悟

文：Lz

6年前，我也是要返工，工人姐姐放假，星期日便到我當值24小時！

有無人幫？無！

由早上睡醒打開眼嗰刻，媽媽便不停鬧我、鬧姐姐偷佢錢、點衰點衰⋯鬧到面紅耳赤，又不停開合櫃桶、將衣服全扔地上、不停拍門，不肯吃飯、將飯餸全撥落地，我用盡我以為可以制止佢嘅方法，鬧番佢！氹佢！但全部都不湊效！

媽媽好似一個上咗鍊但又壞咗嘅機械人，失控又力大無窮，我制止唔到佢熄唔到佢個制，點呀？！

嗰種無力感，嗰種壓力，如果隔離有個大煙灰缸，我會馬上拎起！嗰刻，我崩潰了。

後來，當然無做兇手啦，我要幫媽媽，佢變咗，佢有病，我要幫自已，要不自己先倒下，媽媽點算？

找人幫？找誰？我去返醫院找醫務社工，因為醫院有底，比較快可以了解到有咩可以幫到我，排期做職業治療做腦部訓練，排定政府院舍，排日間中心……勿論是否幫到是否有效，但當時唯一能做的便只有這些。

我每天安排姐姐工作，安排買咩餸，安排姐姐帶媽媽去社區中心玩，落樓下公園做運動，盡量讓佢放電，我自己上網睇認知障礙症嘅資料，報護理課程。

每天工作時提心吊膽，不知會有哪些突發事情發生，又擔心姐姐不懂照顧對佢唔好，晚上回家還要輔導姐姐情緒，加人工當然係唔少得的。媽媽晚上不睡覺，我攬住佢兩母女睡一起，輕輕力拍佢背脊，係佢耳邊話佢乖，這樣哄佢睡，我堅持咗大半年。

後來媽媽中風，插胃喉，轉去私院照顧，成功甩掉胃喉。到疫情爆發，院舍不能探，我決定帶佢走，回家安老去！

要找路行，找方法，找人幫，利用社福資源，儲備好經濟，錢很重要，調節好自己嘅心態，安排自己休息同有番朋友社交。

這是我一路走來的小小歷程。我不會叫人加油，但自己在無人幫的情況下，要自己幫自己。