60出頭入住長者屋，係乜嘢玩法？（上）

係呀，我搬咗去老人院！日本叫做senior residence /senior mansion，即高齡住宅，香港叫長者屋。係一棟新落成嘅綜合大廈，高層係一般出租公寓，中層係長者屋，下層係寫字樓停車場等等。長者屋實用面積由40多至60多平方米，設備同普通住宅冇分別。夫婦二人入住兩房單位，有開放式廚房（無火煮食），浴室廁所洗衣機，衣櫃鞋櫃貯物空間，仲有寛濶露台。

 

全屋使用趟門設計，無障礙通道，特別洗手間預留空間方便輪椅出入。長者屋最下一層（10樓）係介護層（special care floor)，係真正老人院，每戶獨立房間，二十四小時有專人照顧。將來一旦身體出現變化，經過評估就可以直接落10樓，唔需要再去搵老人院，係最大賣點。

 

9樓有食堂供應早午晚三餐，連飯都唔使煮。認識一對70+夫婦，太太話佢煮咗飯幾十年飯，都要退休！我哋趁仲有手有腳，一星期落去食幾餐，鍾意就自己煮幾餐。其他設施包括大浴場、由蔦屋書店管理嘅圖書館、麻雀房、卡拉OK房、健身房、、多用途活動室。每星期有hair salon上門, 可以預約理髮。長者屋住客可以自由出入，大廈正門入口有面容識別系統，唔記得帶鎖匙都返到屋企。

 

睇咗長者屋一年多，參觀過好幾個設施，最後都係揀咗市區呢度，貪其交通方便，附近有超市藥房可購買日用品，還有不少隱世小店餐廳。本來郊外環境會比較好，但如果有朋友到東京探我，出嚟食餐飯都山長水遠，就更加冇社交生活。