【50歲後才開始的事】快樂節約生活（3）屋企斷捨斷

文： Janet Lui

(編按：作者閱讀日本71歲單親媽媽紫苑的著作後，反思50+生活、衣食住行、中產身份障礙。連續四週文章，將從日本退休處境談到香港情況。)

住與「斷捨離」方面，《71歲，將所有下點功夫，以年金每月5萬円快樂地過節約生活》作者紫苑好坦白：「我覺得『終活』同minimalist唔啱我囉，我就係鍾意儲自己鍾意嘅嘢吖嘛。」

作者一直無置業，因為 freelance 以及單親媽媽身份，根本無銀行會做按揭，由離婚到湊大對仔女，佢都係住响「UR賃貸公團住宅」，用香港相似脈絡去理解，即係巿建局嘅公營資助房屋，比較接近房協屋邨，按不同城規，配套會好啲，租當然亦貴啲。例如佢離婚後，揀公團住宅係因為唔似租私樓要比三個月按金禮金押金，而且邨內有晒幼稚園、公園、中小學、街巿、圖書館，佢可以步行距離半小時內接送晒細路再返屋企做嘢。

一家三口住630呎（咳咳，東京最低人均居住空間係大過香港嘅），月租24萬円（當時七算計，約萬八港紙）；後來仔女出身搬細咗（月租14萬円），加加埋埋每月要交住民稅、國民保險（相等香港的差餉，同香港無嘅年金保險），每月固定開支20萬円（約萬四蚊港紙），退休得嗰每月5萬円，實在住唔起。

當佢每日愁緊以後住邊時，响屋企散步見到有細細棟一軒戶（接近村屋格局，但可以細好多）放售，樓齡40年、啱啱reform咗，疫情前跌到1560萬円（約80萬港紙）時，佢拎晒供咗嘅保險一炮過買入。因為係自己物業，唔駛交管理費又可以住到死，計返啲租，住夠6年以上就係淨賺，唯一擔心係呢棟村屋分兩層，每層實用面積300呎左右連天台，每日上落樓梯萬一跌倒失救就大鑊（後來先識得搵人驗樓同做居家安全評估，其實好平已經可以响屋企後加扶手）。樓就買咗，重新構思起居空間時，佢諗緊點樣用百円店買到嘅雜貨， DIY 收納、以整潔、有幾常用、就唔就手為重點去斷捨離：第一件唔要嘅，係電視。

而掉嘢、清雜物都係「先分出最鍾意嘅嘢，其餘就以『能否馬上輕鬆收納整理』為捨棄原則」，响呢個過程，佢明白到自己有昭和時代老人家「唔好嘥」、多物質就安心嘅壞習慣，只有決定令自己每日都覺得舒適整潔，先係重掌生活主導權。

無論幾鍾意，若成為身心負擔、被物慾所困，倒不如每日逐少積存快樂，讚下自己「今日間屋都係無囤啲垃圾喎 ／ 好整潔喎」，更加係長者宜居嘅生活態度。

（待續）