大銀
陳先生在大銀投稿的「我老母系列」,從兒子的角度看母親的一生。

【我老母系列】9 火爆性格

媽咪嚟咗香港之後,透過同鄉喺工廠搵到份工。

我估媽咪聰明,學習能力強,工作好快上手,老闆都讚佢。有一次佢病咗,瞓咗喺屋企兩個星期,老闆親身上門探佢,又預支人工,叫佢買舊豬肉煲湯飲。我估媽咪當時係營養不良,而且做嘢太搏命,體力透支。

媽咪話佢當時做紗廠,每日天未光就起身返工,天黑先返屋企。煮幾粒米,食個飯就瞓覺。第二朝起身又再返工,一日工作10幾小時。佢話當時冇放假呢樣嘢,基本上係一個星期返足七日,一年只係放農曆新年假,好似機械人咁。

媽咪講起老竇最勞氣。

我15歲嗰年,屋企由細屋搬大屋,但係老竇自此消失。媽咪話係因為老竇唔肯俾家用,我相信係老竇唔肯分擔增加咗嘅租金,但媽咪堅持要搬,結果搬屋之後,老竇就咁離開咗。媽咪自此擔起頭家,壓力更大。

分擔家用應該只係導火線,夫妻不和好可能係性格不合。上一代嘅事我未必知得晒,但係媽咪個性好強,脾氣好大,其實同任何人相處都可能會出問題。佢而家雖然年過90,但係火氣仲係好猛。

好多年前,Helen Reddy有首歌叫做You and Me Against the World,講嘅係作為一個單親媽咪,點樣同個女相依為命,一齊對抗逆境。我相信媽咪嘅負面情緒,反映佢過去曾經面對嘅沉重壓力同不愉快經歷。