【我老母系列】11 紅色銀包仔

呢個係媽咪畀我嘅銀包仔，最近我每日去探媽咪，都帶住個銀包仔喺身邊。

最近幾年，媽咪成日話自己唔見嘢。其實呢個現象好普遍，老人家記憶力衰退，好多時都會唔記得自己喺邊度放低啲乜嘢，到要搵嘅時候就搵唔到，於是感到不安。

媽咪仲多一個問題：佢會想像有人偷佢嘢，例如姐姐偷嘢，但係其實嗰啲事根本冇發生過。佢甚至會話有神秘人入屋偷嘢，仲入房拉佢張被，情節十足鬼故咁，我當然唔信。

有一日，媽咪趁姐姐落街買嘢，就將個銀包仔交畀我，話啲錢放喺屋企唔安全，要由我保管，佢要錢使先至再問我攞。

我二話不說就應承，因為咁樣係令佢安心嘅最好方法。而且當佢下次再話自己唔見錢嘅時候，我可以拎個銀包仔畀佢睇，提佢啲錢喺我嗰度，冇唔見到，佢幾時要錢使就問我攞。

照顧媽咪最重要，唔係照顧佢嘅身體，而係照顧佢嘅情緒，最緊要係媽咪唔好驚，唔好擔心。