【我老母系列】2 街坊有情

媽咪好威，佢住嗰座大廈所有看更都識佢。樓下嗰條街有好多排檔，我諗好多排檔擋主都認得佢。

有一日媽咪又大發脾氣，話要出街。佢鬧人好兇狠，工人姐姐都唔敢勸佢。落到樓下，看更見到我媽咪，問佢去邊，佢又答唔到。看更勸佢，話咁大年紀，唔好去街，好易跌親，佢又唔聽。

媽咪出到街，去到附近一個賣衫排檔。佢搞咗排檔檔主一輪，居然仲攞咗人哋幾件衫走。行到攰啦，後來返咗屋企，仲剪走啲衫嘅招紙。姐姐後來攞返啲衫畀排檔檔主，仲話唔好意思，招紙剪咗，要畀返錢。檔主居然話冇所謂，唔緊要。

我第二日去探媽咪時，順便向排檔檔主講唔好意思，檔主猛咁話唔緊要，話知道我阿媽係咁！我又向樓下看更講對唔住，麻煩佢哋。其中一位看更話：你阿媽諗嘢一嚿嚿，脾氣又大，工人成日俾佢鬧。

姐姐唔止一次話要辭職，話被我媽咪鬧到神經衰弱。不過姐姐真係好好，我加人工同安撫之後，佢都願意留低幫手繼續照顧媽咪。