【我老母系列】4 陪伴是心藥

關於照顧媽咪呢件事，由一開始，我無諗過要去「解決」問題，只係嘗試去「管理」問題，唔俾佢惡化。

媽咪已經年過90，身體只會不斷退化，呢個過程唔太可能停止。對於佢個腦退化症，如果期望能夠解決，似乎亦係不切實際。

如果以為將媽咪揼畀老人院，就可以甩身，唔使再跟，亦唔係正確態度。任何一個人，求嘅唔應該只係生存，或者身體機能運作正常。人有情緒，需要安全感，需要家人關心。有傾有講，有家人喺身邊非常重要。

上次睇醫生，話媽咪個腦可能小中風，影響情緒控制能力，本來話要照CT scan（電腦掃描），隔一陣又話唔使。我估醫生態度係，照咗又點？呢個我都同意，小中風根本唔會復原，最緊要個人開心。

其實媽咪已經食緊好多藥，我見到都覺得辛苦，我真係唔想要媽咪再食更多藥。佢已經成日嗌住要走，我最想佢唔好驚唔好嬲，情緒穩定。所以，家人陪伴同照顧係最重要。