【我老母系列】7 屋企人唔明

喺照顧媽咪嘅問題上，我曾經同屋企人有唔同意見，佢哋唔理解有情緒問題呢回事。

屋企人有時話媽咪唔講道理，媽咪唔應該咁；有時又話媽咪發神經，痴咗線。有一段時間，我哋幾個照顧媽咪嘅人，壓力好大。

媽咪嘅問題係情緒問題。佢嘅怪異行為，例如無端端執衫，半夜落樓，係源於佢嘅焦慮同不安，而佢感到不安，最終係源於由腦退化症帶嚟嘅認知障礙。

唔少香港人缺乏對精神健康嘅認識，以為冇病冇痛，行得走得，就係健康。佢哋又唔知道有情緒問題呢回事。

要了解一個人嘅行為，特別係表面睇起嚟怪異嘅行為，我會嘗試同佢直接溝通，認真聆聽，特別係要觀察佢背後嘅情緒，然後去搵背後嘅原因，對症下藥。