【我老母系列】8 回憶都是負面

媽咪唔係一個容易照顧嘅老人家，唔單止因為佢個性好強，脾氣好大，亦因為佢係一個負能量比較多嘅人。老人家經常重複講以前嘅事，在我記憶之中，媽咪講過嘅絕大部份都係負面嘅！

媽咪喺鄉下出世，傳統社會重男輕女，農村有溺死女嬰嘅風俗。媽咪話佢有一個家姐同埋一個細妹，一出世就被浸死。佢唔知自己點解可以生存落嚟，幾次講起呢啲事，都話自己差啲被浸死。

媽咪屋企好窮，為咗減輕家庭負擔，佢七八歲就搬咗去姓陳嘅家庭做童養媳。可以想像，細細個就離開父母，童年就喺一個完全陌生嘅環境之中度過。

不幸地，媽咪個未來奶奶，即係我嫲嫲，對佢相當不友善。媽咪話佢細個嘅時候，有得做冇得食。食飯嘅時候，一夾餸就畀嫲嫲用對眼厲住。媽咪童年嘅記憶就只有落田做嘢，完全冇遊戲嘅記憶。

所以到媽咪24歲嗰一年，有一日上晝，屋企人問佢想唔想去香港，佢馬上答應，下晝就出發，離開鄉下。坐車24個鐘頭之後，終於嚟咗香港，然後就開始喺香港超過70年嘅生活。

(P.S.陳老太在香港有甚麼遭遇？下集講！)