【護士分享】好醫生走後

醫護人手流失難免

文：安姑娘

「Dr. X要走啦！」

「係咩？無收到風喎？」

「係呀，我聽某某講㗎。」

「真可惜，又少一個好醫生。」

「係啦，現在那位Dr. Y，都唔明佢點開藥，Bed 2喘氣咁嚴重都唔開針機、Bed 10咁痛都唔開嗎啡。」

「開電腦睇吓先……Bed 2 有針藥在需要時可以打……不過就無點打過；至於 Bed 10……佢無定時的嗎啡處方，但有需要時服的……」

我走去 Bed 2，院友腰板豎直端坐床上，臉容疲憊，兩手緊握床欄，胸口上下大幅地上落喘氣。檢視氧氣喉在鼻上，另一端接駁妥當，度數正確。我輕輕接觸他的前臂，細聲問：「你條氣係咪有D緊？」

他慢慢張開眼睛望我，口形說係，但無聲。

我再問：「攞止喘針給你，你比較吓用完有無好D，好嗎？」

他考慮了幾秒，點點頭。

針藥後看到他多了撥弄頭髮，撥弄枱上私人物品。大概兩小時後，他又開始進入定格。

「你想不想要多次止喘針？如果你想，現在夠鐘可以再比你，放心，超過限量的話電腦會鎖死比不到的。要嗎？」

「要！」

之後我去找Dr. Y：「Dr. Y: Bed 2氣喘，在時限內已比盡所可以比的止喘針了，麻煩你一陣看看。」

「哦。」他答了一聲。

。。。。。。。。。。。

行到Bed 10 ，看不出院友有任何不適或痛的樣子。

「XX，你痛嗎？」

「梗係有啦，無痛仲住院？不過你哋無人理過我！」

「你係好忍得痛的人，單憑你個樣，一D都看不出你痛，現在攞一些止痛藥給你好嗎？你現在這些痛，痛了多久？」

「係無好過。」

「咁你會唔會想要止痛針，多過食的止痛藥？」

「你哋係醫護人員，你哋反過來問我？」

聽到病人憤怒，我繼續解釋：「同樣的止痛效力，針藥大概10分鐘，口服大概 20分鐘生效，針藥係會較口服快，但要拮一針。以你現在的辛苦程度，會點揀？」

「食的。」

「收到，馬上去攞給你。」

待他吃了藥，我再解釋：「目前醫生的處方，你的止痛藥需要時服，如果你沒有主動提出要求，我們單從你的面容，完全看不出你一直辛苦緊，只是比較沉静。你想不想我們定點派藥時每次都主動問你要不要止痛藥？」

他點頭。

「Ok，我寫落交更，亦和同事交待一聲，每次定點派藥時都主動問你要不要止痛藥，另外幾時止痛效果未如理想，或者我們問太多令你太煩影響休息，你要出聲呀。」

如是者當日派了幾次需要時的藥物。Dr.Y 看到派藥記錄，自動改動了處方。

再看Bed 2，Dr .Y除了落班前修改了處方，我們跟新份量；醫生在落班回家後，從電腦檢視所使用針藥的頻率，亦處方了針機。

同事說：「拍Dr. Y真係好煩，以前的Dr. X多好！仲有，唔係每個同事都夠膽比需要時用的止痛藥、止痛針，煩死人，無眼睇。」

「走了不會返轉頭，每位醫生、每位同事，都各有處方喜好和見解。而隨時間過去，用藥、處理手法亦會有新的潮流趨勢。我要做的是要找到自己的定位，無論當刻返工拍誰搭檔，自己的目標是，就是當刻可以怎樣令眼前紓緩科的病人或家人舒服和安心。」