【50歲後才開始的事】快樂節約生活（2）調整衣食住行

文： Janet Lui

(編按：作者閱讀日本71歲單親媽媽紫苑的著作後，反思50+生活、衣食住行、中產身份障礙。連續四週文章，將從日本退休處境談到香港情況。)

《71歲，將所有下點功夫，以年金每月5萬円快樂地過節約生活》全書章節分為食、衣+生活、住、（最重呢三章）健康管理、取捨、消解物慾與理財、如何消除不安活下去。由每月只花 1 萬円（約HK$510）食費，如何煮出美味又營養均衡的三餐。附有食譜、煮食、採購方法、理由、營養面，以及過這種每日三餐都落手煮的原因。附圖有如何用 ¥1000買4日份的食材，並將之化為甚麼料理。

食物方面，作者紫苑（同好多香港人一樣）响工作壓力下食無定時，又有時stress eat或為咗「食好西減壓」而暴飲暴食，一直都有腸躁症同消化不良。退休後，佢重新檢視自己飲食習慣，以又平又高蛋白質嘅豆腐、沙甸魚、雞肉，以及又平又襟放嘅菇類、根菜類為主食，大幅放棄甜品零食，以自製零食（如烘麵包邊、甘酒雪糕、減甜曲奇）等等取代，結果長年腸躁症竟不藥而癒。

我自己都學到嘢係如何煮一人份的三餐而不太重覆、買多咗嘅新鮮菜又可以點樣有效存放响冰格（洋葱、小松菜、豆芽、牛蒡都可以切絲分包响冰格冷凍滾個湯時就有菜做餸）。而無論出於節約抑或防災食物管理，以 ¥100～200＠上下為基線，多少少採購罐頭蕃茄、鯖魚，舊換新咁食，都係一個幾精明嘅方法，去令自己日常已經習慣料理應急食材，這不單是很好的防災練習，亦是很好的認知訓練，萬一有地震等等狀況，都可以熟練地自理。

作者仲搵到錢時熱愛和服，因為受bubble時期的價值觀影響，動輒幾十萬上百萬円咁買，買完又唔諗係咪有咁多場面著，而且和服一闊三大，又腰帶、又花布襟、又配飾，買到連個和服櫃都冧咗；不單止和服，洋裝又係紅色大褸都買三件但一次都無著。疫情前，教著和服都叫有少少「興趣變生財技能」，但疫情隔離下，以上工作清零，迫佢反思自己「著得靚靚 vs 究竟自己係鍾意乜嘢」其實有多大關係。於是佢開始咗：
1）留返少數咩場合都啱著嘅和服，响重要場合、去名店時著；
2）DIY現有衣物、去recycle shop將舊物變新（me：咁佢又幾好眼喎，仲可以穿針）。

日本坊間針對銀髮巿場出嘅時尚雜誌（如：《鶴與花（つるとはな）》或《那個型格的大人穿著（ 素敵なあの人の大人服）》）感覺上都係搵個好有型嘅銀髮老人、件件都好貴嘅又或者個個都 Iris Apfel 咁，仲著3吋高踭鞋，成抽 accessories，少少離地囉。紫苑由沉迷時裝，到60幾歲決定唔再化妝、唔再染髮，咁點先可以每日都打扮得精神為切入，用藍白色為主、經典 French Sailor's Shirt（即係無印成日賣嗰啲橫間 tee），以舒服、活動自如、通爽物料如純綿或綿麻為主，recycle 布碎做 head bend 去遮白髮，都係務實得嚟好睇自在嘅打扮 ── 呢個係愛自己嘅表現嚟，抵讚。

（待續）