【照顧媽媽】7 請工人（上）

列出對外傭的要求

文：小燈泡

媽媽突然不良於行，子女未退休，只有兩個選擇：一就去老人院，第二就係請工人在家照顧。

雖然我之前請過工人，已是20年前的事。以下是2022年3月請工人的過程，當中考慮的因素，分享給大家參考：

• 首先同媽媽商量，根據需要同性格，怎樣的工人比較適合她

• 將來係工人同媽媽住，兩個人必須可以溝通，想請識講廣東話的工人。如果只懂英文，什麼事都要搵我溝通，我是無法兼顧

• 在香港打過工完約的工人，已經適應香港，不會有思鄕病

• 如果工人已婚有仔女，唔使擔心佢做幾年後要回鄉結婚生育

• 工人年紀希望唔太大，要扶抱媽媽，體力要能夠應付

• 講清楚畀工人聽，佢要獨力照顧媽媽，一日三餐，屋企清潔，陪睇醫生，須有相關經驗

• 假期我們會回家照顧媽媽，大部份時間工人可以放假

整理好之後，就聯絡各大agent物色人選。我們要求一定要有面試，睇啱先至確定請。

以下係整理好的請工人指示：

「希望請本地完約傭工，有照顧長者和殘疾人士經驗。懂得講廣東話和長者溝通，照顧一個72歲女性長者，行動不便，需要扶抱，用尿兜和去廁所大便，幫助洗澡。家住X區X房單位。工人可以自己一間房。希望假期可以盡量在家，願意補錢替假。我們是天主教，若果是回教，要可以處理豬肉食材。沒有寵物，幾時上班都可以。」