【照顧媽媽】8 請工人（中）

面試外傭注意事項

文：小燈泡

有兩三間外傭中介公司打電話同我講，𠵱家人工已經去到$6000以上。由國外請返香港，要三個月之後，沒有面試，只可以睇相及履歷。我回覆這些公司：不適合。

最後一間有回覆，我揀咗一些寫明有經驗，條件比較適合的，打電話約面試，agent 又話佢哋續了約，不來了。

通常遇到以上的挫折，我都會好徬徨。不過這次出奇地平安，心裏沒有特別焦急，我覺得如果請不到，就繼續自己照顧媽媽，希望盡量揀到啱，一take OK。

諗起聖經：「事事都有定時，生有時死有時。」可以做嘅已經做了，那些控制不到的事，就交托給天主去決定吧。我相信衪是愛我的，衪交給我的工作，也是我有能力做的。我要甘心地去做，不會埋怨。我告訴agent：「唔急，你幫我再留意。有啱，你畀我面試。」

跟住有一個星期日， agent打電話說𠵱家有好多姐姐來面試，問我得唔得閒。我梗係話好啦，啱嗰啲全部畀我面試。

見第一個，冇乜照顧長者和殘疾人士經驗，唔考慮，無時間慢慢教。

見第二個，有照顧殘疾人士，不過只負責清潔和買嘢，大部份貼身照顧是事主家人做的，這個也不適合。

跟住見第三個，大部份工作經驗是照顧老人，還續約幾次。最近這一次，她照顧認知障礙症的90歲婆婆，因為婆婆入院舍所以不續約。她獨立照顧婆婆，要幫沖涼。我見姐姐身形嬌小，但照顧的婆婆比我媽媽大隻，就覺得她適合：「姐姐，我覺得你好啱我哋呀，你願唔願意嚟我哋屋企做啊？我畀你睇吓我哋屋企係點樣，畀你見吓婆婆。」

姐姐睇完之後好開心，就應承來工作。我覺得佢好啱，面相和善，廣東話講得清楚。要求人工$5,500，我覺得最近時勢都應該係市價就應承。

＊現時法定外傭最低工資$4,630