3招應對偏食長者

家人90幾歲，淨係鍾意食甜，會唔會唔夠營養？

很多照顧者都會擔心家人吃得唔夠健康、偏食，唔夠營養。早前舉行嘅「大人健康課」講座，有照顧者喺小組講出面對緊嘅困境：「我家老人家90幾歲淨係愛食甜，冇哂牙都食威化餅、紅豆餅，正餐又食得少，話工人姐姐煮得唔好食！」

資深老人科醫生莊麗及營養師葉俊言分享3招：

偏食唔一定出事

「視乎長者只係唔食某一種食物，定係唔食整個組別嘅食物。如果只係唔食鯇魚，而魚類可以提供蛋白質同奧米加3，其實可以從肉類獲得蛋白質，從其他食材獲得奧米加3。

我哋其實唔係要逼佢食嘢。

我哋係想佢攝取足夠營養，而諗辦法提供含呢類營養嘅食物畀佢。」

食嘢係享受

「食嘢唔想好似交功課咁，叫老人家先食幾多克嘅肉、再食幾多碗菜，然後食碳水化合物，跟足哂指引，但同佢平日習慣唔一樣，只會令佢更唔想食。

胃口唔好，冇得夾硬嚟。

要諗多啲橋，攝啲食物喺整個生活，唔只針對每次正餐。」

活用營養補充品

「根據肯食嘅嘢，撈啲補充品入去，例如蛋白粉。

邏輯上，用補充品補齊哂營養，長者食少咗食物都可以，但係一定要睇返體重。

因為進食份量少咗，如果體重下跌，熱量就唔夠。需要烹調上落功夫，例如加多啲煮食油，唔煮烚菜，轉炒菜，加返熱量。」