【我老母系列】19 媽咪話要糴米

陪伴98歲的媽媽

文：陳先生

好耐冇講我老母，今日又講幾句。

話說今日工人姐姐放假，我要去媽咪屋企睇住佢，直至工人姐姐夜晚返嚟為止。

媽咪今年97歲，過埋年底生日，就98歲。佢身體不斷退化，仲患上腦退化症，佢每日喺屋企，但係唔知道自己喺邊度，不過佢已經放棄「返屋企」，因為佢已經行都行唔到。

佢最近唔單止行唔到，連企都企唔穩，唔係向前跌，就會向後跌。佢亦失去咗語言能力，而家基本上係講BB話，大部份時間我唔知佢想講乜，不過有陣時都估到佢講乜嘅。

今日想記低幾個喺照顧上我覺得有趣嘅細節位。

1.陪伴最緊要

媽咪喺房瞓緊覺，我坐喺佢床邊。每次我起身行出廳，佢都有反應，好似自動會醒咁。我坐返低，佢又好似放心咗，轉頭就聽到佢鼻鼾聲。

2.媽咪忽然醒咗，話要糴米，我同佢講話已經糴咗，佢之後面露笑容，似乎好放心。

3.老人家同BB好似

媽咪想起身，我要扶佢起身。佢想食飯，我要餵佢。我坐喺佢隔離，用手指掂住佢隻手，佢會握住我隻手指，就好似我放隻手指喺BB手掌裏邊，BB會握實隻手指咁。

我理解觸摸都係溝通，當老人家失去理解同表達能力之後，身體接觸其實更加重要。