【我老母系列】16 媽咪嘅自我中心

我哋屋企好少朋友，細個時唔覺，大咗就會問：點解我冇乜長輩朋友？媽咪係一個愛恨分明嘅人，佢好多時會重重複複講邊個人邊個時候曾經幫過佢，但亦都會因為一次誤會而幾年唔見人。

我大個咗亦都奇怪，點解我哋屋企唔使拜山？親戚朋友都一樣，似乎人一走咗，媽咪就真係唔再聯絡。

媽咪冇乜朋友，佢只係知道人要做嘢。喺佢眼中，一個人有用就有朋友，冇用就冇朋友。呢幾年我去探佢，佢成日話自己冇用。

媽咪嘅自我中心，直接令佢冇乜朋友，而社交圈子好窄，又令佢衰老過程加速。媽咪近呢幾年身體退化得好快，同佢缺乏社交生活有好大關係。社交需要活動，亦需要記性，而活動同記憶對減緩衰老過程十分重要。

媽咪點解咁自我中心？我心中有數。其實佢個世界好細，知道嘅嘢好少。佢喺好艱苦嘅環境裏面生存同成長，但另一方面，佢係一個好敏感嘅人，知道自己識嘢少，加上自尊心重，於是唔敢走出自己嘅安全區(comfort zone)。

當然，理解係一回事，同意係另一回事。我唔同意媽咪咁自我中心，自我保護，將自己封閉係一個咁細嘅世界裏面，呢個係一個缺點。媽咪有缺點，但我會用理解嘅態度去面對。佢話自己冇用，我就會話：「妳一世人做咗兩世人嘅嘢，依家90幾歲，應該享仔福，享孫福。」我又會話：「我哋細個嘅時候，妳照顧我哋，咁今日我哋照顧返妳，好公道。」