【我老母系列】18 身體接觸的溝通

有語言困難嗎？我會拖住你的手

文：陳先生

最近收到朋友嘅資訊，內容係關於認知障礙症十大病徵，包括失憶、語言困難、迷失時間和方向、判斷力退減、智力思考能力衰退、行為和情緒的改變、個性的改變、失去主動力、亂放東西、難以處理日常事務。

媽咪十個病徵都有晒，不過我最近特別留意佢嘅語言困難。最初媽咪經常講嘢講到一半就停落嚟，然後就話自己唔記得咗想講乜嘢。不過佢講咗嘅一半，我仲係聽得清楚。最近我開始發覺，媽咪講嘢愈嚟愈唔清楚，好多時候我其實完全唔知道佢講緊乜嘢。不過唔緊要，我仲可以應住佢先，話「係呀？」或者「啊！咁呀？」其實佢需要嘅係陪伴。好多時我坐喺度睇電視，媽咪都會繼續講。如果我聽到佢講重要嘅嘢，我就mute咗個電視，叫佢再講多一次。

最近我又多咗用另一個方式同媽咪溝通。作為仔，由細到大我都好少主動同佢有身體接觸。最近當我見到佢嘅時候，我會摸吓佢嘅面頰，或者佢隻手，睇吓隻手凍唔凍。媽咪最近跌瘀咗，我又幫佢捽吓跌打咁。我覺得佢好似幾接受。

有幾次我坐喺媽咪隔籬睇電視，感覺到佢手踭伸過嚟，掂到我手踭。我覺得呢啲接觸會畀到佢實在，安全嘅感覺。認知障礙症患者好多時都會迷失時間同方向，缺乏安全感。當佢哋又失去語言能力嘅時候，身體接觸就變成另一種溝通方式。咁係一種需要，可能比講嘢更有實在嘅感覺。