【我老母系列】17 媽咪的靈性世界

幾時可以走？天知道！

文：陳先生

媽咪係一個冇受過教育嘅人，連自己個名都唔識寫。因為咁嘅緣故，佢嘅世界好細，唔只係朋友少，冇乜社交生活，亦冇乜精神生活。記得細個喺屋企，媽咪逢初一十五會拜神，傳統華人點香燭燒冥鏹嗰種。

近呢一年，每次去探媽咪，佢成日嗌住要「走」。佢嘅厭世情緒好明顯，而且幾強烈。喺佢嘅價值觀裏面，「有用」就有價值，冇用就冇價值，就要離場，就要「走」。佢面對嘅係一種沮喪嘅情緒。

人怕死係好自然，面對死亡，人總係有焦慮。媽咪成日話好辛苦，我問佢邊度唔舒服，佢又講唔出，有時又話最好瞓一覺就走咗，我都明白佢怕痛怕辛苦嘅！所以，老人家心境複雜，既沮喪又焦慮。有一次同朋友分享，佢提議我同媽咪講：「一個人幾時走，係由個天決定！不如妳去問吓個天：『我可以幾時走呀？』」

第一次同媽咪咁講，佢聽到之後，靜咗落嚟！我估佢從來冇咁諗過。佢根本冇諗過要問邊個人，問啲乜嘢，因為佢係一個好自我中心嘅人。佢個世界好細，我希望呢個問題可以為佢開一扇窗，令佢睇到好遠好遠嘅另一個世界，喺嗰度有啲嘢值得佢去留意，去探索。

之後我再同媽咪重複講咗幾次，叫佢問吓個天佢幾時可以走？我相信，「天」－唔係抽象嘅概念，反而係每一個人樸素嘅經驗。我會叫呢啲做靈性嘅層面。我相信一個人無論幾老，都有學習嘅能力，都有探索新事物、追求新經驗嘅能力。我希望呢啲新經驗可以幫助媽咪處理情緒問題。