【我老母系列】15 整蘿蔔糕的印傭姐姐

三年前，屋企請咗一個印尼傭工幫手照顧媽咪，我哋叫佢做阿蓮。阿蓮以前嚟過香港打工，主要係照顧小朋友。佢冇照顧老人家嘅經驗，不過佢好肯學。

我哋決定請工人，係因為媽咪身體退化到一個地步，已經再冇照顧自己嘅能力，例如冇辦法自己煮飯，自己沖涼，甚至自己食飯。有一段時間，佢成日話自己冇用。

不過，最大嘅挑戰係媽咪認知障礙帶嚟嘅情緒問題。佢愈嚟愈認唔到自己喺屋企，於是會驚，一驚就發惡，就鬧阿蓮。有一段時間，阿蓮話自己畀媽咪鬧到神經衰弱，仲話要辭職。後來我哋加人工，佢亦接受繼續幫手。

我一直同阿蓮保持溝通，解釋媽咪嘅情緒問題。其實情緒問題唔容易理解，因為唔係跌損膝頭，撼親個頭，見到流血嗰種。但係阿蓮好肯學，願意聽，願意理解，而佢亦慢慢理解我媽咪嘅情緒問題。阿蓮甚至會幫手勸我媽咪，有時又會主動建議我點樣照顧媽咪。

我覺得阿蓮最難得嘅係佢有心，係攞個心出嚟打呢份工，呢啲唔係份人工包咗嘅嘢。阿蓮係印尼穆斯林，我以前唔識印尼人，亦冇接觸過穆斯林，但係最緊要嘅唔係呢啲身份嘅嘢。經過三年相處同溝通，我覺得阿蓮係一個好人，一個識為他人設想嘅好人，就係咁簡單。

舊年過農曆年，阿蓮話識得整蘿蔔糕，仲主動問自己整蘿蔔糕好唔好？我梗係話好。