【我老母系列】12 打針定唔打針？

文：陳先生

因應需要抉擇

喺疫情高峰期，當每日有幾萬宗確診個案嘅時候，我都好緊張。於是我決定唔再喺媽咪屋企食飯，只係去坐吓，而且全程唔除口罩。我要做到萬無一失，心諗如果媽咪中招，就真係大件事。

媽咪打唔打針，我同屋企人商量過，結論係唔打。因為媽咪年紀太大，而我哋對疫苗利弊有保留。後來當我發覺，大部份長者死亡個案都喺老人院出現，我感覺自己係避過一劫。

當初唔送媽咪去老人院，純粹係覺得佢性格唔適合。依家睇到老人院裏面有咁多長者死亡個案，我就更加覺得我係啱嘅。老人院着重群體生活，而群體生活係染疫嘅主要途徑。要保持社交距離，留在屋企最好。

其實我知道老人院仲有好多其他問題，呢個喺我決定唔送媽咪去老人院之前已經知道。如果話，照顧媽咪最緊要係照顧佢嘅情緒，咁老人院一定唔會做得好，因為佢哋只會照顧長者一日三餐，同埋唔畀長者跌親。聽聞有啲老人院會將情緒亢奮嘅長者綁手綁腳，呢個我不能接受。

當然每個家庭有自己嘅處境，世上亦冇十全十美嘅解決方案，送唔送老人家去老人院，每個家庭要自己決定。

（註：執筆時已為媽咪預約上門打針，但仍未約實時間。）