【我老母系列】13 媽咪的奇幻旅程

文：陳先生

長者不知身在何處

媽咪嘅認知障礙愈嚟愈嚴重。我尋日去探媽咪，佢一見到我，就話自己畀人趕來趕去，仲問我跟住要去邊度？又話要搵幾件衫，但唔知去邊度搵。其實媽咪日日都係屋企，根本冇出過門口。

媽咪似乎已經喪失短期記憶能力，幾分鐘前見到嘅嘢，幾分鐘之後就會唔記得咗。因為冇咗短期記憶，佢每一刻見到嘅世界，都係一個陌生嘅世界。佢每一日都喺度搵緊自己喺邊度，然後每一日都係一個失敗嘅經驗，因為佢始終唔知自己喺邊度。

我覺得媽咪嘅經驗好似電影《少年Pi的奇幻漂流》。少年Pi 遇到海難，喺太平洋漂流。每一日佢都會見到唔同嘅嘢，而且相當魔幻。有時會見到啲從來未見過嘅、好靚嘅珊瑚魚；有時見到一大群飛魚由水面撲出，飛過救生艇；有時突然有鯨魚跳出水面，之後跌番落水，巨大嘅衝力會將救生艇反轉，跟住自己跌咗落海。

少年Pi一個人喺茫茫大海，係一種漂泊、徬徨，甚至魔幻嘅感覺。媽咪都一樣，佢每一日都經歷漂泊、徬徨同埋魔幻。但係佢仲認得人，仲認得自己仔女，佢仲有長期嘅記憶。佢見到我，就會有番啲實在嘅感覺。所以佢每次見到我，都唔想我走。