【照顧媽媽】5 按摩神醫？

早在媽媽留院時，已經提及認識一名盲人按摩，還說幾個朋友腰骨有事，都係按摩後「醫好」。做完手術後，她要去找這位盲人按摩，看看對方能否幫助她康復。

出院時，大概是做完手術一個月，她說已與對方約好，叫我夜晚九點，駕車送她去青衣找這個盲人按摩。我說：「你做手術冇幾耐，嗰個盲人按摩，又唔係醫生，一陣間按到有問題，點算呀？」

媽媽回應：「我之前都畀佢按過，對佢有信心喎。」我說：「你之前係未做手術，梗係冇問題啦！而家咁大件事，畀佢按完有問題，神仙都難救啊！」媽媽不作聲。

過了幾天，她與朋友傾完電話，又說朋友稱盲人按摩可上門為她按，叫我買張按摩床。我看過按摩床後與弟弟商量，他們都不同意，說按摩床不夠穩陣，萬一跌下來就大件事。按摩技師不是醫生，亦不清楚媽媽接受的手術，大家覺得按摩沒有特別用處。

又過幾天，媽媽提起弟弟的傭人按摩好舒服，不如叫傭人來按摩，她自己付錢。看見媽媽第三次提起按摩，她可能真的肌肉非常痠痛，很想按摩。於是，我再同弟弟商量。

傭人來到後，我向她清楚講解媽媽傷口位置在哪裏，哪些身體部分不可以按。傭人又叻又醒目，帶備藥油。按完一個鐘，媽媽覺得很舒服，安樂了！

之後安排每星期按摩一次，媽媽說按完之後，有幾天肌肉有點痛，但之後幾天「鬆晒」，她非常鍾意。我覺得按摩是否真的有效並非最重要，也許可以舒緩，又或者心理作用。最緊要是媽媽感覺開心便足夠！