【我老母系列】5 唔好否定佢

媽咪記性越來越差，經常唔記得鎖匙放喺邊，假牙放喺邊，銀包放喺邊。令到媽咪感到不安，產生好多負面諗法，例如懷疑有人偷佢嘢。

又會將好多唔同嘅人同事撈亂埋一齊，其實我一聽就知道，全部係佢想像出嚟，根本唔係事實。我同媽咪溝通，留心嘅唔係佢講乜嘢，而係背後反映嘅情緒。我唔會駁斥佢，話佢講嘢全部係假！我會話：唔見咗嘅嘢喺屋企裏面，一定搵得番！

媽咪有時又話自己無用，行都行唔穩，我就同佢講：「你一世人做兩世人嘅嘢，而家仲想做？你九十幾歲啦，應該享仔福，享孫福！」

我唔會否定媽咪嘅情緒，會盡量令佢知道，我明白佢心情唔好，引導佢諗多啲正面嘢。

尋日返屋企探媽咪，一見到我，就問我做乜車佢嚟依度？我話呢度喺你屋企，佢就唔出聲。佢經常講嘢講到一半就停落嚟，因為已經唔記得自己要講乜。

佢唔止一次同我傾偈時話好驚，其實唔難理解，睇到自己身體退化，記性又差，甚至經常唔知道自己喺邊度，點會唔驚？

我每次返去睇媽咪，其實唔係要同佢講乜嘢，最緊要係陪住佢，畀佢睇到我。