【我老母系列】6 尊重「小朋友」

媽咪越老越似小朋友。

有時去探佢，買豬腸粉畀佢食就好開心。有時去到屋企，佢瞓緊覺，我會坐喺床邊睇手機。佢擘開眼，見到我，個笑容真係好似小朋友咁。

媽咪情緒變化好大。有時姐姐話佢上晝心情好好，晏晝就會大發脾氣。呢一點亦都好似小朋友。

佢以前唔係咁，雖然個性不嬲好強，但係唔會無端端大發脾氣。而家情緒大上大落，好似喜瑪拉雅山山頂嘅天氣一樣，無人可以完全把握。

不過，老人家始終唔係小朋友，佢有記憶，亦有自尊心。媽咪成日話自己「共公」(鄉下話，指頭暈暈，亦有傻傻地含意)，姐姐又跟住話佢「共公」。

我同姐姐講，媽咪講自己就得，佢講媽咪就唔好。雖然話老人家似小朋友，但同佢哋傾偈，唔可以完全用對小朋友語氣，老人家仍然需要尊重。

老人家亦有記憶，佢嘅經歷會反映喺情緒上面，例如憤怒同委屈。媽咪講番好多年前嘅事，好多時都係因為佢咬住負面情緒唔釋放。雖然重重複複，但係每一次講，都係想人哋明白。

所以我唔會被佢覺得我當係耳邊風，總之要有傾有講。