【照顧媽媽】4 包尿片後遺症

文：小燈泡

媽媽做完手術後住院差不多兩個月，由於失禁又癱瘓，所以每天要包尿片。

「姑娘幫我包片的時候好大力，一日換片只有一至二次。換咗片，我都唔敢屙尿或者屙屎，驚住皮膚出疹。」後來媽媽覺得身體痕癢，姑娘話皮膚已經開始爛，找了醫生開藥膏讓她塗抹。姑娘不准媽媽搔癢，說抓出傷口受感染就更難痊癒。加上疫情的緣故，姑娘希望大部份長者盡量可以回家。了解情況後，我決定接媽媽出院。

回到家，第一件事換衫。一脫褲子，我看見只想喊，忍住。媽媽由腰部以下，臀部，兩隻腳，全都甩皮，紅紅爛爛，很瘦。我立即幫她抹身，再搽藥膏。

媽媽擔心失禁，叫我繼續幫她包片。但我說：「唔好繼續包片啦，咁樣你皮膚好唔番，最多夜晚包片，日頭一定唔好包了。」我墊一張膠枱布在床上，近臀部位置，告訴媽媽即使不小心瀨尿，也不用擔心弄污床舖，我可以為她抹身換褲。醫生處方的藥膏細細支，只用於搽臀部皮膚最爛的部份。我又去藥房買多一支BB尿疹潤膚膏，為媽媽每天早晚搽雙腳。後來媽媽可以坐起，我幫她浸腳，之後用毛巾捽去腳上死皮。第一次看見真的嚇人，捽多幾次之後，慢慢將死皮去清。

每晚睡覺之前帶媽媽上廁所，又囑她夜晚想小便可以叫醒我。這樣過了兩三天，媽媽不再小便失禁，就夜晚都不用包尿片了。

又過了一個月，看到媽媽雙腳皮膚回復正常，不用再搽藥。媽媽見到雙腳變回又靚又白淨，覺得很開心。我告訴她，要好好照顧自己的身體，健康一定會好轉。好似她雙腳目前不良於行，只要慢慢繼續努力做康復運動，便會逐漸改善。要多給信心，相信自己的身體。

媽媽笑說：「都係你嘅功勞，阿媽好在有你執番條命呀！」我說：「只是剛好我在家工作，才做得到的。而且我們信主，孝順父母是應該的，有機會及有能力做也是有福的。」