【50歲後才開始的事】快樂節約生活（1）脫離中產幻覺

文：Janet Lui

(編按：作者閱讀日本71歲單親媽媽紫苑的著作後，反思50+生活、衣食住行、中產身份障礙。連續四週文章，將從日本退休處境談到香港情況。)

《71歲，將所有下點功夫，以年金每月5萬円快樂地過節約生活》（《71歲、年金月5万円、あるもので工夫する楽しい節約生活》）的作者紫苑同香港文藝界好多人一樣，一直做freelancer；而同佢嗰個bubble世代嘅boomer一樣，佢响佢最搵得錢嘅日子，完全無攪清楚投資係乜就 all-in 買咗雷曼，所以棺材本無晒，响60歲先開始愁退休點收科。

另一吸引我睇嘅，係佢係一位單親媽媽，獨力養大兩個仔女（好在唔係啃老族）。呢個身份正好對比同時我睇緊嘅不婚不生主義者上野千鶴子教授，以及由全職主婦轉型為搬運公司老闆嘅杉之原富士子。三種女人，基線都係中產，佢哋對於自己、整個社會系統，係點去務實處理安老呢？（必須講，好悶地，日本男性作者寫安老都係好「置身事外」，好唔 real，亦無好日常嘅 actionable）

佢做 freelance 收入最穩定嘅40至50歲，完全無諗過「安老」呢件事，而真正令佢第一次醒，係佢患上乳癌，而佢終於放下「中產自尊」，運用厚生省專為單親家庭而設嘅醫療費全免保障，淨係兩次手術，佢已經慳咗70幾萬，亦令佢驚覺要處理健康及老後問題。

書中有講獨居老人响疫情隔離、疫後獨自生活，呢類書先係啱返而家呢個世界。另一個香港人好值得借鑑嘅係，佢响處理自己財政生活時由「中產幻覺」之中醒咗，坦誠面對真實的財務及健康狀況，不要放棄求助、不要為「面子」死撐、幾多歲都要update自己生活技能。

書中講嘅安老生活、節約理念及自我定位的改變，都是基於一個有自理能力、沒有腦退化、無大病要長期接受醫療照顧，仔女亦已經自立嘅長者生活。而每月5萬円年金（約港幣 $2500），係無計到醫療開支，因為作者本人係受單親醫療費全免保障。

（待續）