【我老母系列】14 我要返另一個屋企

文：陳先生

時間與空間錯亂

媽咪已經90幾歲，佢經常唔知道自己喺屋企。雖然我每次都同佢講佢喺屋企，但係佢似乎愈嚟愈唔信，總係嗌住要走，有時甚至大發脾氣。

照顧患有腦退化症嘅老人家，其實好有挑戰性，只能夠邊做邊學，學習應變。有一次我勸媽咪唔掂，就叫姐姐推佢落街行一轉，之後再返屋企。另一次我又勸媽咪唔掂，我同佢講，細佬就快嚟搵佢，叫佢唔好走。

最近一次，媽咪又話要走，我同佢講佢喺屋企，佢唔同我拗，索性話自己有兩個屋企，點都要走。媽咪成世人搬過好幾次屋，的確曾經住過幾個地方。佢嘅記憶愈嚟愈紊亂，好似亂咁剪片咁，將唔同時空嘅片段剪埋一齊。

佢由屋企出到𨋢口，周圍望，似乎好努力咁認自己身處嘅地方，因為佢真係唔知自己喺邊度。其實佢已經行唔到，行兩步路就再冇力行，結果就挨住牆，企喺度繼續發脾氣，甚至掟手上枝棍。我好無奈，但係姐姐反而叫我唔好理佢，話睇住佢就得。媽咪發完脾氣之後，攰啦就會返入屋。

我請到咁嘅工人姐姐，真係好幸運。