【照顧媽媽】9 請工人（下）

主僕相處和諧 減輕照顧壓力

文：小燈泡

請咗工人之後，預計要兩個月後才返工。媽媽很擔心：「你唔好請咗工人就即刻走，唔理我呀！」我答：「我會喺度起碼一星期，睇佢做到我做嘅嘢兩至三次，都好妥當，我先至會走，你放心啦。」

媽媽說：「屋企貴重嘢，全部攞晒去你嗰度啦，我驚自己睇唔到，畀人攞咗我都唔知。」我將攞走的物品影相存檔，留一份記錄在媽媽櫃桶。

媽媽又說：「我想你陪我睇醫生，我驚聽漏嘢，或者問漏嘢，得唔得呢？」除咗骨科覆診需要多啲跟進，問醫生情況之外，睇中醫和物理治療基本上每次一模一樣。我揀需要特別同醫生溝通才陪診，其他畀工人接手。

媽媽經過物理治療，本來只可以企5分鐘，慢慢可以用支架行到，扶抱漸漸不需要那麼大力。剛開始時教工人畀媽媽用尿兜，去廁所，沖涼程序，要適時改變。我同媽媽講，最好我睇咗OK先改。後來，媽媽自己和工人商量，改變去沖涼，去廁所的方法，唔需要再問我意見。我覺得佢哋可以夾到，減輕我的擔子，是天賜的福氣。

由於姐姐有工作經驗，大致上一講就明，好快上手，唔使一個星期，什麼都做到。剛好，老闆召我返公司，不可以在家辦公，我便告訴媽媽要搬返去啊。

媽媽初初有點唔捨得，問我三次幾時返嚟。第一個星期，我天天打電話返去問有冇問題。媽媽對工人讚不絕口，會推佢去公園，去買餸，買佢鍾意食嘅魚，蒸魚好味，又同佢按摩。夜晚又會起身同佢屙尿，同埋順手熄燈，覺得工人好慳。

看來，全職照顧媽媽這份工作，我終於可以光榮退休啦。