【給爸爸的信 】2

爸爸

雖然你走了個多月，我仍然好掛住你呀！

每日放工，回家途中，駕車經過你之前住過的醫院，眼淚就會自然流出

有時行過百貨公司男裝部時，望見啲衫，就想起你！

坐在咖啡店時，也回想同你一起嘆咖啡

我仍需要時間調整自己，不用擔心

我只是很思念爸爸！

我會好返的

我會好好生活，好好工作，好好照顧自己，好好照顧媽媽

媽媽好叻呀！佢比我更堅強

記得很久前，你當時身體還算健康

我有一段時間，工作不順利，壓力好大，回到家對住你

你叫我要堅強啲！洗乜喊呀！做得唔開心咪唔好做囉！你老細會搵返你嘅！

結果我真係唔撈啦！有爸爸照起多好呀！

 

當你們兩老身體慢慢衰退⋯⋯我要擔起照顧的責任，我要同你換轉角色啦！

由我照起你

其實你的認知障礙症，醫生話係中期

在照顧路上，雖然有點累，有時仲會好嬲你唔聽話！其實我唔應該嬲你，好對唔住！

但我沒有放棄過，做得不足，我更加要再做好啲

我要再俾無限愛心給你，盡量放假都拖著你四處逛，周圍搵嘢食，買東買西

買到畀媽媽鬧⋯⋯

 

可惜我而家唔可以再拖住你隻手！

 

囡囡上

2023年3月12日

______________

「仍放不下，感到自責，好多如果⋯⋯」畢業照顧者寫信給離世的父親，抒發思念，釋放自己。