【我老母系列】3 誰來照顧

媽咪兩年前身體退化得好快，屋企人考慮過一係送佢入老人院，一係請工人照顧，結果選擇後者。

點解唔送媽咪入老人院？一來宿位唔多，一等就可能幾年。二來宿位可能有，但一係好貴，一係環境唔夠好。

更大問題係，好多老人院要求長者同其他人共用房間，又有好多群體生活安排。要求長者同其他陌生人一齊生活，係咪適應到，要視乎長者性格。媽咪性格好強，就算同仔女住，都未必冇問題，何況同陌生人一齊住？

仲有一個問題最關鍵，就係疫情期間老人院曾經唔俾仔女探望。如果媽咪住老人院，冇仔女探佢會好慘。

請工人照顧，唔一定請到好。如果不斷換工人，媽咪亦未必適應到。不過，我哋只能搏一鋪，結果好好彩，搵到個十分之好嘅姐姐照顧媽咪。

不過，照顧媽咪嘅責任始終唔可能全部交託俾老人院，姐姐亦只能夠照顧佢一日三餐，睇住唔畀佢跌親。至於情緒問題，只能夠由至親去處理，所以我每日都去探媽咪。