大銀
疫情下公營醫院超負荷,資深護士安姑娘分享病房照顧長者病患的忙碌日常,以及如何在逆境中在身心社靈各方面照顧好自己。
護士分享 忙到一頭煙

「今日齊唔齊腳呀?」

「XX今日中咗,另外YY就未完七天隔離。」

「黐線㗎!仲收6個新症!」

兩個同事由一個病格,去另一個病格努力地換片。有同事在努力地執藥。

「嘟!嘟!嘟!」近廁所的病人落了床欄想如廁。

我正要給藥附近另一位病人,連忙道:「你唔好自己落嚟,乖啦,疴落條片到我哋幫你換啦。」

「人哋明明行得,你唔畀我行多啲,練好啲力,我點樣可以快啲離開出院?」

我一邊執藥,用眼、用心,口裡卻要回應:「你腳力未去到可以自己一個人安全地上廁所,而我們亦實在冇人手陪你去。 萬一大吉利是你跌倒,出院就會節外生枝啦。」

這病人仍想爭取,但亦無奈地留在床上。大家都很無奈。

斜對面另一病人高聲嚷:「姑娘,你未幫我換片喎!」

我手裡仍然執藥、派藥,唯有答:「你這病格應該換完喇喎?」

「我而家又濕咗啦。」

「咁要等一等,等同事换完其他病人再返轉頭幫你換。」

「咁都有嘅!唔幫人換片!」

接著幾位病人都說話:「姑娘我好痛呀,你幫我打針啦!」

「姑娘你幫我打電話畀屋企人啦,我想見見他們。」

這邊廂的婆婆不停的敲枱敲床欄,那邊廂另一位病人大叫:「阿婆你唔好嘈啦!你睇姑娘都忙到冇停過手啦,好煩呀你。」

「等我先派完這個病人的藥,下一個先幫你。」內心開始燥:「救命!已經忙到一頭煙…… 」

工作一再超時…….

今日的寧養科,環境與理想相差很遠。

清楚知道外境改變不到多少,唯有盡力在身、心、社、靈各方面好好照顧自己,感恩所有以不同方式在不同崗位中默默努力的人。

食飯、飲水、上廁所,放工、放空、深呼吸。

在能力範圍可及的地方,對家屬沒法來探訪只能交託的至親,盡力做好一點點—— 在逆境中不退的初心,歷事練心。