接更等候時，同事忍不住呻：「 唉，馮伯又無理取鬧啦！」

另一位接更同事專心看病人名單，看著電腦沒回應。有同事就答嘴：「馮伯？唉，你仲未慣？有些病到上腦、有些認知出問題，又或者腫瘤轉移去腦部……都唔嬲得咁多。放開些，唔好咁認真啦。」

「我都知，都同自己講：份糧預咗！不過，連他的家人都一樣無理取鬧！他們個腦無病喎！」

「係搵到解決方法之前，都係要呻下嘅，等人之際，你呻啦。」

護士都是人

「我其實都唔係想呻㗎，真係想可以練成百毒不侵！就算幾難聽的說話，最好都唔會傷身，更加唔會傷心，不會被說話令到自己難受。不過我還未接受到。」

「你認真諗清楚：那些說話令你身體真的損傷？那些說話是如何影響到情緒？繼而失去自由？」

「我都知，好清楚知道幾時勒唔住自己，惡言相向，上司或者外界總會覺得錯的一定係自己。外界會評價唔夠專業——不過我哋都只係人啫！」

「有咩方法可以唔受影響呢？」

另一位同事插話：「我好佩服啲病人聯絡主任，成日都要聽病人或者家人投訴，佢哋點做到的呢？」

「我真係聽過一個坐呢個位嘅同事，分享處理方法：佢話總之一路聽一路點頭，一路點頭咪咪嘴笑，不時俾下回應。至於個心就飛咗去旅行，飛咗去食好好食的東西，諗緊收工之後做什麼……總之就是一些好開心的畫面。」

「咁都得？唔驚被人發現時，對方更加嬲，更多投訴？」

「咁佢又係聽到投訴人所講的投訴，同埋有跟進的。」

「我有聽過有人：在自己心入面，將投訴者講嘢的聲音較細、加些背景音效甚至變聲。例如將佢原本的男聲變為女聲，女聲變為男聲。」

「變為 RAP 版！」有同事搶答：「我諗到！或者將佢改為唐老鴨嘅聲。鴨～鴨～鴨～鴨！」

「哈哈！」「或者喺腦海中將前面那個人好嬲的樣變樣…..加個小丑鼻，戴花花太陽眼鏡。」

「加貓咪、小狗嘅面譜….」

「卡通化後，好自然就將直沖過來的衝擊傷害減低。不過亦要留意自己只係用來放輕鬆自己，不能表現輕佻！ 」

終有一日練就百毒不侵

「大家還記得早排成日都鬧人那位婆婆？」

「記得，當時我都怕咗佢。不過只要佢一戴上那對又圓又大又厚的老花眼鏡，就好像一條金魚，有點滑稽，馬上就由嬲，變得好搞笑。」

「情緒即時就轉化過來，咪幾好囉！唔需要執住她那些令人難受的行為和說話。」

「我還記得當時因為要傾出院，她女兒盡得媽媽的『真傳』。每位聯絡過這女兒的同事，都怕了她！」

「係呀，又記唔記得當媽媽之後轉差得很快，過咗身一段時間後，女兒卻送了一個超大個的果籃同感謝卡！」

「記得！簡直懷疑唔係同一個人！」

「所以有時對讚賞唔需要特別高興，責罵亦唔需要咁認真。總之有則改之，無則加勉，無需要牽動自己的情緒。知道自己做緊乜嘢，做好本份就好了。」

「當發現自己的情緒被他人的行為或者說話牽動，就是訊號告訴自己：我要抽離一下，深呼吸幾下、走開一陣、飲杯水……」

「安安，你練到百毒不侵未呀？」

「當然未啦！不過以前假如一日有十樣嘢會令自己嬲，今日有其中有一樣，唔再嬲；以前隨便一樣嘢，自己可以嬲十個鐘，今日可以比昨日嬲少一分鐘——我相信總有一日，可以練成！」

「係啦，其實就算我覺得份工好有意義，願意為份工每日多做半個鐘、一個鐘免費 OT，都無需要令自己唔開心。」

同事搶答：「反而要收叔更多的開心、成功感去補數！」

「唔～」大家相視微笑，眼神變得精靈，有所領悟地點頭。

外境的本質、結果，受天時、地利、人和影響。每人給別人看的墓碑面積、留給自己的記憶都有限，你會選擇那些用工具刻鑿，永不磨滅？那些會選擇用毛筆沾水寫上，蒸發後不留痕跡？