今日冷了很多，出門口前母親打量說：「着衫呀！」鼻子有點痕：「哦！ 」轉身出門就走了。

今天天灰灰，有點雨。母親說：「帶遮呀！」「 哦！」應付一聲就離開。

凍凍哋今晚在家打邊爐。「這邊生肉才剛放，你那邊的肉就算熟了，也要等這邊的熟了才可以吃呀！」心想：「我這邊已經熟啦！」口裡敷衍：「ok！」

「食咁少，嗱！」母親舉筷把餸夾到面前的碟子：「把這些都食清光啦！」心裡喃喃：「食足幾十年！」嘴巴一聲：「 哦！」

「菠菜和豆腐⋯⋯」心裡跟著一起唸：「⋯⋯不可以一齊吃的！」口裡答：「知道！」

「夜麻麻先來洗頭！用風筒吹乾先好瞓！」「哦！」心裡嘀咕：「我都知⋯⋯不過已經好眼瞓！」

「又不穿拖鞋！講幾多次赤腳行地板，寒氣由腳板底滲入，對身體唔好！」心想：「邊有事啫！」

「嘩！成兩點！唔好讀啦！識唔識都好，要瞓啦！」「媽！知啦！」心想：「仲有咁多未温⋯⋯」

「諗唔到點計，你對住佢都係無用㗎！掃吓地，洗個面，或者沖咗凉先，返轉頭就諗到㗎啦！」頭有點痛，抱著頭心想：「係就好了！」

電話筒傳來：「⋯⋯依家幾點呀？幾忙都放低工作食咗先啦！食嘢要定時！」「好⋯⋯知道了⋯⋯唔講啦！」

「洗錢要量入為出！唔好先洗未來錢！」「你借住給我先啦！出糧還給你！」

「媽，我不想用你的錢去交學費！」「錢用了，可以再揾。學到的知識經驗，自己的就是自己的。」

「仔女幾親都好，將來自有家庭，自己的伴侶才是陪自己的。」「媽！我唔去相親呀！」

⋯⋯⋯⋯

「媽！點解你一句話不留低就走！」

媽俯視微笑：「你記得我講過的，我時時刻刻就在你身邊。」